Skedel by Pearl Harbor opgegrawe
2011-07-21 11:10
Honolulu – Bemanningslede wat opgrawingswerk doen het ‘n skedel op die bodem van Pearl Harbor gevind.
Argeoloë vermoed dit is 'n skedel van 'n Japannese vlieënier wat in die geskiedkundige aanval op 7 Desember 1941 gesterf het.
Jeff Fong, ‘n argeoloog, het die vonds aan die nuusagentskap AP beskryf. Hy sê die skedel is in April gevind toe baggerwerk in die hawe gedoen is.
Die skedel is in die kanaal naby die hawe se skeepswerf gevind.
Volgens Fong is ander items soos ‘n Coca-Cola-bottel wat uit die 1940’s dateer, ook opgegrawe. Dié vonds verskaf leidrade dat die skedel van die Tweede Wêreldoorlog is.
Volgens hom het argeoloë vasgestel dat die skedel nie aan ‘n antieke graf in Hawaii behoort nie. Die skedel word ook nie verbind aan enige saak van vermiste mense nie.
Fong sê hy is 75% seker dit is ‘n Japannese vlieënier se skedel.
Volg Nuus24 op Twitter.
- Sapa - AP