Situasie in Thailand begin stabiliseer
2010-05-22 18:32
Bangkok – Thailand, wat gebuk gaan onder sy ergste geweld in menseheugenis, kan so vroeg as November ’n verkiesing hou, het die land se minister van finansies Vrydag gesê.
Soldate het Vrydag padblokkades van lemmetjiesdraad beman en die verlate sentrale sakegebied vir wapens en plofstof deurgesoek.
Dit kom twee dae nadat hulle die nege weke lange anti-regeringsbetogings deur lede van die Rooi Hemde beëindig het. Voertuie is ook vir wapens deurgesoek.
Brande wat Woensdag deur betogers by winkels gestig is, het Vrydag nog gesmeul.
Die betogers het ’n beroep vir nuwe verkiesings gedoen en gesê die premier, Abhisit Vejjajiva, het nie ’n mandaat nie omdat hy ná ’n omstrede parlementêre stemmery en danksy steun van die weermag in 2008 aan die bewind gekom het.
Abhisit het verlede week ’n aanbod vir ’n verkiesing teruggetrek.
Die minister van finansies, Korn Tsjatikavaniej, het gesê hy verwag ’n vroeë verkiesing en hy twyfel of die regering sy volle termyn tot 2012 sal uitdien.
Korn het op ’n nuuskonferensie in Tokio, Japan, gesê hy kan nie seker wees dat ’n verkiesing in November gehou sal word nie, maar die moontlikheid kan nie uitgesluit word nie.
Hy is vol vertroue dat die ekonomie vinnig weer op dreef sal kom indien die stabiliteit van die laaste 48 uur gehandhaaf word.
Die premier sou die nasie Vrydagaand op televisie toespreek, het ’n regeringswoordvoerder gesê.
“Dit (die onlangse gebeure) het die vertroue in Thailand geknou. Die regering en die veiligheidsmagte moet gou reg en orde herstel sodat sakeondernemings hul bedrywighede kan hervat,” het Nandor von der Luehe, voorsitter van die Gesamentlike Buitelandse Handelskamer van Thailand, gesê.
“Terselfdertyd moet die regering ook verseker dat gewapende elemente nie ondergronds gaan en ’n guerrilla-oorlog begin nie,” het hy bygevoeg.
Skoonmakers het Vrydag opruimingswerk by Bangkok se spoggerige winkels gedoen.
Baie winkels en banke was gesluit, openbare vervoer was beperk en die week lange openbare vakansie het daartoe gelei dat baie van Bangkok se 15 miljoen inwoners by die huis gebly het.
Tientalle geboue, insluitend banke en dié van die aandelebeurs, is Woensdag aan die brand gesteek.
Die Rooi Hemde ondersteun die oudpremier Thaksin Sjinawatra, wat in 2006 deur die weermag uit die kussings gelig is.
Thaksin is in selfopgelegde ballingskap om tronkstraf vir beweerde magsmisbruik vry te spring.
Hy is onlangs in Parys gesien en sou tydens sy private besoek ’n nuuskonferensie oor die gebeure in Thailand hou, maar die Franse owerhede het hom gewaarsku om dit nie te doen nie.
– Reuters