Siriese rebelle neem beheer van weermagbasis

2012-12-11 17:50

Beiroet – ‘n Aktivistegroep sê Siriese rebelle is nou in beheer van die weermagbasis wat hulle twee dae gelede aangeval het, en waar 35 regeringsoldate in gevegte met dié rebelle gesterf het.

Die Siriese Waarnemers vir Menseregte het gesê die Sheik Suleiman-weermagbasis naby Allepo is Dinsdag deur die rebelle oorgeneem.

Die rebelle het die basis Sondag die eerste keer ingeval.

Behalwe vir die 35 soldate wat dood is, het die rebelle ook 64 soldate gewond en gevangene geneem.

Intussen het AFP berig dat meer as 500 000 Siriese vlugtelinge tans in hul buurlande geregistreer is.

“Volgens ons jongste syfers uit Libanon, Jordanië, Irak, Turkye en Noord-Afrika is 509 559 Siriese burgers tans geregistreer, of besig om te registreer, as vlugtelinge,” het die Verenigde Nasies in ‘n verklaring gesê.

Meer as 40 000 mense is in Sirië dood sedert die opstande in Maart verlede jaar begin het.

– Volg Nuus24 op Twitter
 

- AP