Siriese betogers loop deur onder tenks
2011-10-29 11:24
Amman – Siriese tenks het Saterdag 'n ou distrik in Homs aangeval in een van die hewigste gevegte sedert die weermag twee weke gelede sy aanslag op dié stad verswaar het.
Dié militêre aksie is daarop gemik om teenregeringsbetogers in die stad te onderdruk, het inwoners gesê.
Die Syrian Observatory for Human Rights, 'n menseregtewaghond, het gesê dit wil voorkom of een betoger in die aanval dood is, met vyf ander wat beseer is.
'n Ander menseregegroep, Sawasiah, het gesê militêre aksie in Homs het in die laaste tien dae tot die dood van minstens 300 burgerlikes gelei.
Sowat 30 000 burgerlikes is in hegtenis geneem sedert die opstand teen die land se heerser, pres. Bashar al-Assad, in Maart begin het.
– Volg Nuus24 op Twitter.
- Reuters