Sirië: Pro-regeringsjoernalis vermoor

2012-12-04 16:01

Damaskus – ‘n Siriese joernalis wat vir 'n staatskoerant werk is in Damaskus vermoor, volgens berigte deur die plaaslike media.

“’n Gewapende terroristegroep het die joernalis, Naji Assaad, doodgemaak toe hy op pad was na die Tishreen-koerant,” het die nasionale uitsaaier gesê.

Dit is die tweede joernalis in minder as twee weke wat in Damaskus vermoor is.

Rebelle het op 22 November die TV-joernalis Bassel Tawfiq Youssef doodgeskiet waarna hulle hom as ‘n pro-regime militante uitgekryt het.

Vyftien professionele joernaliste en 41 sogenaamde amateur joernaliste is al in Sirië doodgemaak sedert die opstande verlede Maart begin het.

Intussen word twee buitelandse joernaliste in Sirië vermis.

Die Palestyn Bashar Fahmi al-Kadumi word al sedert 20 Augustus vermis terwyl die Amerikaanse vryskutjoernalis Austin Tice op 13 Augustus verdwyn het.

– Volg Nuus24 op Twitter
 

- AFP