Sirië: Dodetal al op 39 000

2012-11-15 13:22

Beiroet – Die opstand in Sirië teen pres. Bashar al-Assad se regime wat 20 maande gelede begin het, het al meer as 39 000 lewens geëis.

Die meeste van die slagoffers was burgerlikes, het die Siriese Waarnemers vir Menseregte gesê.

Die menseregte-groep sê 27 410 burgerlikes, 9 800 soldate en 1 359 rebelle is in die konflik dood sedert dit op 15 Maart 2011 begin het.

Rami Abdel Rahman, hoof van die groep, sê nog 543 mense wat nie geïdentifiseer kon word nie, moet by die syfers gevoeg word, wat die totaal op 39 112 te staan bring.

Die syfers sluit nie mense in wat tans vermis word nie.

Rahman het bygevoeg dat dit verskriklik moeilik is om korrekte syfers te bekom omdat beide die weermag en die rebelle nie oor hulle volle verliese wil berig nie.

– Volg Nuus24 op Twitter