Siamese tweeling geskei
2009-11-17 12:46
Melbourne - ‘n Siamese tweeling van Bangladesh wat by hul koppe aanmekaar geheg was, is na ‘n operasie van 25 uur, van mekaar geskei.
Dit is nog te vroeg om vas te stel of die twee jaar oue tweeling, Trishna en Krishna, breinskade gedurende die operasie opgedoen het.
‘n Span van 16 chirurge en verpleegsters was deel van die tweeling se operasie, wat na Australië deur ‘n hulporganisasie gebring is.
“Die spanne het dit reggekry om hul breine van mekaar te skei en die dogtertjies is altwee in ‘n goeie toestand, het Leo Donnan, die hospitaalhoof gesê. “Nou wag die groot taak van rekonstruksie op ons,” het Donnan bygevoeg.
Plastiese chirurge het reeds rekonstruksie van die tweeling se skedels gedoen deur ‘n kombinasie van hul eie vel, stukkies been en kunsmatige materiaal te gebruik, ongeveer vyf ure ná die skeidingsoperasie begin het.
Die Siamese tweeling is in ‘n weeshuis in Bangladesh in 2007 deur ‘n verteenwoordiger van die Children First Foundation gevind wat hulle na Australië gebring het.
- Sapa