Sewe meisies pleeg selfmoord ná hul eksamen druip

2012-06-15 13:45

Katmandoe – Sewe skoolmeisies het selfmoord gepleeg nadat hulle hul skoolverlatingseksamen gedruip het, het die plaaslike media Vrydag berig.

Twee van die meisies het hulself in Katmandoe om die lewe gebring en vyf ander in ander dele van die land, het die Republica berig.

Kinders in Nepal moet die skoolverlatingseksamen slaag om vanaf 16-jarige ouderdom toegang tot kollegeskole te kry.

Slegs 47% van die sowat 420 000 kinders wat die eksamen afgelê het, het die 35%-slaagsyfer behaal. In 2011 het 55% die slaagsyfer behaal.

Selfmoorde onder jong vroue in Nepal het die afgelope dekade skerp toegeneem en is die hoofoorsaak van sterftes onder vroue tussen die ouderdomme van 16 en 49. Die Verenigde Nasies en ander waarnemers het hul kommer oor die probleem uitgespreek.

– Volg Nuus24 op Twitter

- Sapa-DPA