Seuns dryf 50 dae op see
2010-11-25 10:40
Wellington – Drie tienerseuns is gered nadat hulle glo vir sowat 50 dae in ‘n klein bootjie op die Stille Oseaan rondgedryf het.
Die drie seuns het op 5 Oktober aan die kus van Tokelau, Nieu-Seeland, vermis geraak. Na ‘n intensiewe soektog van verskeie dae het nooddienswerkers hoop opgegee en die reddingspogings gestaak. ‘n Gedenkdiens is ook vir die seuns gehou.
Volgens Radio Nieu-Seeland is die seuns noordoos van Fidji deur ‘n tuna-boot gered.
“Hulle het erge sonbrand opgedoen, maar het net basiese noodhulp nodig gehad,” het Tai Fredricsen, ‘n visserman aan boord van die boot, gesê.
Die seuns het glo glad nie kos of water gehad nie. Hulle het egter daarin geslaag om ‘n seemeeu te vang en moes dit rou eet.
Na bewering sal die seuns teen Vrydag in Fidji se hoofstad, Suva, aankom waar hulle in ‘n hospitaal opgeneem sal word.
Volg Nuus24 op Twitter.
- Sapa - AFP