Seun onthoof pa tydens familietwis
2013-02-14 08:25
Sydney – ‘n Man is Donderdag in Australië in hegtenis geneem nadat hy glo sy pa onthoof het toe die ouer man probeer het om sy vrou tydens ‘n familietwis te beskerm, het die polisie gesê.
Toufic Zahab (69) is dood nadat hy glo in sy huis in ‘n woonbuurt in die weste van Sydney met ‘n baksteen en ‘n mes aangeval is.
Die polisie het bevestig dat die man se kop afgesny is en sy vrou word vir skok behandel ná die aanval wat glo deur hul 42-jarige seun, Khoder, uitgevoer is.
“’n Man is in hegtenis geneem nadat ‘n lyk vanoggend (Donderdag) in ‘n huis in Bankstown gevind is,” het die polisie gesê.
“Die polisie is kort ná 06:00 vanoggend na die toneel ontbied ná gerugte van huishoudelike geweld.
Khoder is in hegtenis geneem, maar is nog nie aangekla nie.
“Die toneel is baie ontstellend. Dit was ‘n moeilike oggend vir beide die familie en die polisie en die ambulanswerkers is tans besig om na hul welstand om te sien,” het Glen Fitzgerald, waarnemende supt. in Bankstown, gesê.
Familielede wat buite die huis was het aan die media gesê die seun het sy ma by die trappe afgestoot, waarna hy sy pa aangeval het toe hy probeer intree het.
Zahab se kleinseun Abdul het aan die Sydney Morning Herald gesê: “Almal is verpletter en geskok.
“Hy was ‘n wonderlike man, ‘n mooi man, bekend in die gemeenskap. Hierdie is die mees onverwagse ding wat kon gebeur.”
– Volg Nuus24 op Twitter
- Sapa - AFP
