Sesjarige deur polisie in Rusland bevry

2012-12-29 12:44

Moskou – Russiese sekuriteitsmagte het Saterdag sewe militante vermoor en 'n sesjarige meisie wat in die Dagestan-streek gyselaar geneem is bevry. 

Die voorval het by 'n woonstelgebou in die provinsiale hoofstad Makhachkala plaasgevind.

Die militante het 'n muur afgebreek en toegang tot die woonstel verkry waarna hulle die meisie gyselaar geneem het, het die nuusagentskap Interfax berig.

Die nuusagentskap het die leier van die militante, wat betrokke was by die voorval, as Gadzhimurat Dolgatov geïdentifiseer en gesê hy is ook onder die sewe wat vermoor is.

Tydens die voorval het die militante op die sekuriteitsmagte losgebrand en granate na hulle gegooi, maar niemand het beserings opgedoen nie.

– Volg Nuus24 op Twitter.
 

- Reuters