Ses tiere op woonstel se dak gevind

2012-09-10 17:32

Bangkok – Die polisie in Thailand het Maandag ses tiere wat erg ondervoed was in spesiale hokke op die dak van ‘n woonstelgebou gevind.

Hulle het ‘n 28-jarige man in hegtenis geneem wat beweer hy het beplan om ‘n dieretuin te begin.

Die polisie het vier wyfies en twee welpies by die eiendom op ‘n nywerheidsperseel in die Pathumthani-provinsie noord van Bangkok gevind.

“Die man beweer hy het beplan om ‘n dieretuin in die provinsie te open,” het kapt. Montri Neepasee gesê.

Hy sê die diere het nie genoeg kos gekry nie en het nie “heeltemal gesond” gelyk nie.

Die tiere is met 10 000 baht (R2 640) se hoenderbene ‘n maand gevoed.

“Hulle het nie genoeg voedingstowwe gekry nie,” het Montri gesê.

Die eienaar van die gebou, ‘n neef van die man wat in hegtenis geneem is, het die diere se teenwoordigheid op die dak geïgnoreer.

Volgens die polisie sal die tiere Dinsdag na ‘n veilige plek in ‘n nabygeleë provinsie gestuur word.

– Volg Nuus24 op Twitter
 

- AFP