Serwië: 6 Dood, 11 000 vasgekeer in sneeu

2012-02-02 16:01

Serwië – Ses mense is dood en minstens 11 500 ander is vasgekeer nadat swaar sneeuneerslae en vriesende temperature in Serwië voorgekom het.

"Daar was sedert die naweek ses slagoffers en ons soek steeds na een persoon," het Predrag Maric, hoof van Serwië se polisie-eenheid gesê.

"Minstens 70 mense is ontruim, insluitend nege wat met behulp van 'n helikopter vanaf afgeleë plekke gered is," het hy gesê.

Reddingspanne met kos en medisyne maak gebruik van sleë om die meeste dorpe te bereik waar dit onmoontlik is om paaie te gebruik.

Intussen is 55 mense dood nadat swaar sneeuneerslae die afgelope paar weke in Japan voorgekom het, het beamptes Donderdag gesê.

In een van die land se koudste winters die afgelope paar jaar is 43 mense dood nadat hulle probeer het om sneeu vanaf dakke of paaie te verwyder. Sewe ander is dood nadat swaar sneeu vanaf geboue of strukture op hulle geval het, het rampbestuur gesê.

Plaaslike polisiebeamptes en reddingswerkers het Donderdag hul soektog na vermistes voortgesit om seker te maak daar is geen mense wat onder die sneeu begrawe is nie, het 'n plaaslike polisiewoordvoerder gesê.

Die weerstoestande het daartoe gelei dat verskeie vlugte en treine vertraag is.

– Volg Nuus24 op Twitter.

- AFP