Sendelinge van VSA in Haïti aangehou
2010-02-05 07:48
Port-au-Prince. – Tien Amerikaanse Christene het gister hier in ’n tronk sit en wag om te hoor of hulle van kinderhandel aangekla gaan word.
Hulle het probeer om kinders te verwyder van die aardbewing-geteisterde eiland, waar die dodetal tot 200 000 gestyg het.
Die tien sendelinge is gedagvaar vir ’n verhoor. Daar sal die aanklaers aankondig hoe hulle die saak – wat reeds ’n skadu oor die yslike internasionale reddingsaksie gooi – gaan hanteer.
Die aardbewing van 12 Januarie het een miljoen mense haweloos gelaat. Baie oorlewendes is desperaat vir kos, water en medisyne,. Dit lei tot protes-uitbarstings in die met rommel en puin bestrooide strate.
Die premier, Jean-Max Bellerive, sê 300 000 mense is beseer, 250 000 huise is verwoes en 30 000 sake-ondernemings is tot niet.
“Haïti se regering het niks vir ons gedoen nie. Ons het geen werk of kos gekry nie,” kla Sandrac Baptiste terwyl sy haar tydelike tentwoning verlaat om aan ’n protesoptog deel te neem.
Terwyl die spanning in die hoofstad hoog loop, het sowat 300 mense buite die burgemeester se kantoor in die Petionville-woongebied betoog.
Nog 200 het na die Amerikaanse ambassade gestap om vir kos en hulp te pleit.
Bellerive sê die sendelinge se geval is ’n “afleiding” vir Haïtiane wat “nou meer oor die lot van 10 mense praat as oor die miljoen mense wat in die strate ly”.
Die vyf mans en vyf vroue van ’n Baptiste-welsynsdiens is aangehou toe hulle die grens na die Dominikaanse Republiek met ’n busvrag van 33 kinders van tussen twee maande en 12 jaar wou oorsteek.
Hillary Clinton, Amerikaanse minister van buitelandse sake, sê dit is “ongelukkig dat dié groep Amerikaners eiereg wou gebruik”.
Dit het aan die lig gekom baie van die kinders het nog ouers of familielede, van wie sommige die kinders aan die groep gegee het.
Die Amerikaners se prokureur, Edwin Coq, sê ’n pastoor van Haïti het toestemming daarvoor gegee.
Ontheemde kinders in die skuddinggeteisterde Haïti verkeer in “aansienlike” gevaar om vir doeleindes van verslawing verkoop te word, en uitgesmokkel of onwettig aangeneem te word, waarsku die VN-kinderfonds gister.
Die fonds se adjunk- uitvoerende direkteur, Hilde Frafjord Johnson, sê ook die aardbewing van 7,0 op die Richterskaal bring die agentskap te staan voor sy grootste uitdaging.
- Die Burger