Selfmoordbomaanvaller het vroulike metgesel gehad

2012-07-23 22:50

Sofia, Bulgarye – Die selfmoordbomaanvaller in verlede week se noodlottige aanval op ‘n groep Israeliese toeriste, het vlot Russies gepraat en het ‘n vroulike metgesel gehad.

Die bTV-televisiekanaal het berig die aanvaller was in die stad van Varna ‘n dag voor die aanval wat die lewe van vyf Israeliese toeriste en ‘n busbestuurder geëis het.

Die aanvaller het glo “biologiese bewysstukke” in ‘n hotel in Varna agtergelaat.

Die koerant Troud het berig dat die polisie op soek was na ‘n vrou wat na bewering saam die man in die hotel in Varna gebly het.

Die vrou is glo ook verbind aan ‘n moontlike tweede man wie die polisie dink die aanvaller se medepligtige is.

Bulgaarse amptenare het tot dusver geweier om kommentaar te lewer en slegs gesê dat die aanvaller 36 jaar oud was, dat hy ‘n vervalste rybewys besit het, dat hy nie van Bulgarye afkomstig was nie en dat hy minder as vier dae lank in die land was.

Israel blameer dié aanval op Iran en sy terroriste-groep Hezbollah. Niemand het al verantwoordelikheid vir die aanvalle aanvaar nie.

– Volg Nuus24 op Twitter
 

- AFP