Sarkozy in die sop oor skoonheidsmagnaat se geld
2011-08-31 21:59
Parys - Die kantoor van Frankryk se pres. Nicolas Sarkozy het heftig gereageer op bewerings in 'n nuwe boek dat hy vyf jaar gelede geld vir sy verkiesingsveldtog by die erfgenaam van die L'Oreal-sakeryk ontvang het sonder om dit te verklaar.
Sarkozy se bondgenote meen die aantygings is 'n smeerveldtog teen die toenemend ongewilde president. Soortgelyke bewerings het ook verlede jaar die lig gesien.
Vrae rondom die finansiering van Sarkozy se presidentsveldtog in 2007 kan sy pogings knou om volgende jaar herverkies te word. Kritici beskuldig hom geruime tyd reeds daarvan dat hy te naby aan superrykes beweeg, kritiek wat hom al meer bedreig namate Frankryk se ekonomie verswak en aanhangers met sy leierskap ontgogel raak.
Die Sosialis Martine Aubry, leier van Frankryk se vernaamste opposisieparty, het reeds gevra vir 'n hernieude ondersoek om vas te stel of Sarkozy onwettig geld van Liliane Bettencourt, Frankryk se rykste vrou, bekom het.
'n Ouditeur van Bettencourt het 'n jaar gelede gesê sy het in 2007 €50 000 kontant aan Sarkozy se partytesourier gegee vir sy verkiesingsveldtog - veel meer as die €4 600 wat die wettige perk op individuele skenkings is. Die aantyging is tydens 'n ondersoek na Bettencourt se finansies gemaak.
'n Boek wat Donderdag bekendgestel word, bevat die bewering dat Sarkozy self die geld ontvang het. Die boek se naam is Sarko m'a tuer ("Sarko het my doodgemaak") en bevat aanhalings deur die regter Isabelle Prevost-Desprez wat sê 'n getuie wat sy ondervra het, het beweer sy het gesien hoe geld aan Sarkozy oorhandig word.
Sarkozy het die bewering as "skandalig, ongegrond en onwaar" afgemaak.
Valerie Pecresse, 'n regeringswoordvoerder, het gesê "die naderende presidentsverkiesing is nie die geleentheid vir allerlei lasterlike bewerings nie".
-Volg Nuus24 op Twitter.
- AP