Saoedi-vroue se reg om motor te bestuur kry steun
2011-06-08 07:30
Pretoria - Vroueregte-aktiviste het ’n reuse-veldtog begin vir die reg van vroue in Saoedi-Arabië om motor te bestuur. Saoedi-Arabië is die enigste land in die wêreld wat vroue verbied om te bestuur. Hulle mag nie eens fiets ry nie.
Moslem-geleerdes is dit egter eens daar is niks in Islamitiese geskrifte wat vroue dit verbied nie.
’n Koalisie van vroue-regte-aktiviste het ope briewe geskryf aan Hillary Clinton, Amerikaanse minister van buitelandse sake, en Catherine Ashton, die Europese Unie se verteenwoordiger vir buitelandse sake, het die organisasie change.org Dinsdag gesê.
Teen Dinsdagmiddag het meer as 19 000 mense in minstens 65 lande reeds dié briewe onderteken op ’n internetversoekskrif (www.change.org).
Dit kom nadat die aktiviste vroeër kon help dat Manal al-Sharif, ’n Saoedi-ma wat in hegtenis geneem is omdat sy bestuur het, vrygespreek word. Altesame 70 000 mense in 156 lande het die versoekskrif onderteken.
Amerikaanse diplomate het die afgelope tyd stilletjies begin druk plaas op die regering om vroue se reg om motor te bestuur, te erken.
’n Onlangse reeks inhegtenisnemings het die aktiviste genoop om Clinton en Ashton te druk om hul stem oor die saak te laat hoor. Die aktiviste het in die briewe geskryf hul land is al bestempel as die grootste “vrouetronk” in die wêreld.
Hul alledaagse roetine word geweldig ontwrig, omdat hulle telkens vervoer na plekke moet reël. Hulle mis byvoorbeeld doktersafsprake en werkgeleenthede.
Die situasie word soms uitgebuit deur eggenote, broers, pa’s en selfs motorbestuurders. ’n Vrou is onlangs deur haar motorbestuurder verkrag, beweer die vroue in die briewe.
Saoedi-vroue word selfs verbied om in openbare busse te ry. Daar waar hulle wel mag, moet hulle heel agter sit.
Hulle mag nie stem nie, het geen eiendomsreg nie en verteenwoordig sowat 5% van die arbeidsmag.
Hulle mag nie eens bank toe gaan sonder hul mans of ’n rekening oopmaak sonder hul toestemming nie.
Ontleders meen die vroue se omstandighede kom neer op ’n soort geslagsapartheid.
Die aktiviste reël nou ’n reuse-protesaksie ten tyde waarvan vroue van oor die land heen op 17 Junie in motors gaan klim en openlik gaan bestuur.
- Volksblad