Sandy laat spoor van verwoesting in New York

2012-10-30 15:19

New York – Die spoor van orkaan Sandy het New York Dinsdag ongewoon stil gelaat.

Die superstorm het die Wall Street- finansiële distrik en die res van laer Manhattan sonder elektrisiteit gelaat en daar is geen aanduiding wanneer die ligte weer aangeskakel sal word nie.

Die strate, baie heupdiep in vloedwater, was onheilspellend stil ná die storm en slegs die klank van sirenes in die verte kon gehoor word. Die enigste lig was kerse in woonstelvensters en die blou en rooi ligte van polisiemotors.

"Dit is nogal angswekkend. Daar is geen lig in die straat nie, geen mense in die straat nie," het Ilona, 'n 22-jarige student van Rusland gesê.

Selfs die verkeersligte was buite werking. Spesiale vragmotors met kragopwekkers is ontbied en owerhede het die George Washington-brug heropen sodat inwoners uit New Jersey ingery kon word.

Daar was egter verwoesting nadat vloedwater van die East-rivier na die stad gestroom het.

In die West Side-hoofweg was die Goldman Sachs-bank een van die min geboue waar die ligte gebrand het.

In 148ste straat in Harlem het 'n dik laag rommel op vuil water gedryf. Werkers het wanhopig gestaar na die verwoesting en het skaars geweet waar om te begin opruim.

Die skade as gevolg van die storm kan volgens sommige waarnemers meer as R160 miljard beloop.

– Volg Nuus24 op Twitter

- AFP