Sakevrou dalk tronk toe oor 'dronk seks'

2012-05-17 13:30

Dubai – 'n Britse sakevrou kan moontlik tot drie jaar tronkstraf gevonnis word nadat sy glo in 'n taxi in Doebai seks gehad het terwyl sy dronk was, het die Daily Mail berig.

Rebecca Blake (29) en Conor McRedmond is gearresteer nadat hulle 'n dag lank gedrink het.

Hulle is vyf dae lank aangehou en daarvan beskuldig dat hulle seks buite die huwelik gehad het en dronk was in die openbaar. Dít is albei misdade in die streng Islamitiese staat.

Blake het McRedmond by The Irish Village, 'n hotelkroeg, ontmoet waar mense £10 (sowat R131) per persoon betaal en 'n dag lank drink.

Dié twee het eers ná 12 uur 'n taxi gebel om na Doebai Marina te gaan.

Volgens 'n polisieverslag het die taxibestuurder hulle in sy spieëltjie gesien waar hulle mekaar passievol omhels.

Die bestuurder het stilgehou en by 'n polisiemotor, wat naby geparkeer was, oor hul gedrag gekla.

Toe die bestuurder en die polisiebeampte na die taxi terugkeer, het hulle Blake en McRedmond op die agterste sitplek aangetref waar hulle besig was om seks te hê.

Die paartjie is van 4 tot 9 Mei by die Jebel Ali-polisiekantoor aangehou.

DNS-monsters is geneem om te bewys dat hulle gedrink en seks gehad het. Beamptes wag nou vir die uitslae voordat hulle dié twee hof toe kan stuur.

Hulle is intussen op borgtog vrygelaat.

– Volg Nuus24 op Twitter