SA'ner vertel van rasse-voorval op Skotse bus

2011-12-08 15:14

Londen – ‘n Suid-Afrikaanse student aan die Universiteit van Edinburgh sê ‘n man op ‘n bus het rassistiese aanmerkings gemaak en gedreig om hom te vermoor.

Riaz Moola (19) het sy traumatiese ondervinding op YouTube gedeel.

Die webtuiste thesouthafrican.com berig die buspassasier langs Moola het vir die student gesê hy moet op ‘n ander plek gaan sit.

“Ek het langs ‘n ou op die bus gesit en hy het my op die skouer getik en vir my gesê ek moet skuif,” het Moola vertel.

Hy sê hy het op ‘n ander plek gaan sit omdat die man ‘n “bietjie skrikwekkend” gelyk het.

Daarna het Moola die man gevra hoekom hy nie daar mag sit nie.

“Hy het gedink ek was van Pakistan en hy het begin vloek en gesê ek was besig om sy land te verkrag,” het Moola gesê.

Die man het na bewering opgestaan en gedreig om Moola se keel te sny en hom te vermoor.

Lees meer hier

Volg Nuus24 op Twitter