SA werkers in Kaboel lê laag
2009-08-20 06:50
Erika Gibson
Al die Suid-Afrikaners wat in Kaboel, die bomgeteisterde Afgaanse hoofstad, werk, was teen gister veilig en ongedeerd.
“Dit gaan sleg hier, maar ons byt vas,” het ’n Suid-Afrikaanse veiligheidspesialis, wat nie uitgeken mag word nie, per e-pos aan Beeld gesê.
Die afgelope twee dae is ’n Britse soldaat dood en ses beseer, terwyl twee Afgaanse werkers van die Verenigde Nasies (VN) ook in twee selfmoordbomaanvalle dood is.
“Die aanval (waarin die VN-werkers dood is) was op ‘IED Alley’, soos daardie pad bekendstaan,” het die Suid-Afrikaner gesê.
Geïmproviseerde ploftoestelle (IED’s) wat op paaie geplant word en met afstandbeheer ontplof word, het die laaste paar weke tot die dood van verskeie Britse soldate en plaaslike inwoners gelei.
Die Taliban staan die komende presidentsverkiesing teen omdat dit beskou word as ’n poging om Westerse waardes af te dwing.
“Die ontploffing het naby Kamp Phoenix, een van die koalisiemagte se basisse in Kaboel, gebeur. Dis vermoedelik teen die Britse magte gemik. Daar is egter heelwat VN-voertuie wat dié pad gebruik,” het die Suid-Afrikaner gesê.
Meer as 20 mense is in die aanval beseer.
“Ons lê laag, maar ons is eintlik al gewoond aan die geweld. Al wat ons hoop, is dat dit ná die verkiesing ’n bietjie sal bedaar,” het hy gesê.
Kai Eide, gesant van die VN in Afganistan, het die Taliban in ’n verklaring versoek om die inwoners toe te laat om vreedsaam te stem.
Die Taliban het volgens Sapa-AFP gesê meer as 20 van sy vegters en selfmoordaanvallers is tans in Kaboel met opdragte om bepaalde instellings aan te val en ontwrigting te saai.
Stembusse open vandag om 07:00.
– Beeld