SA slagoffers se families gesoek ná bom

2012-09-18 11:03

Johannesburg – Suid-Afrika se departement van internasionale betrekkinge en samewerking het die name van die agt Suid-Afrikaners wat Dinsdagoggend in 'n selfmoordaanval in Kaboel, Afganistan dood is, ontvang.

"Ons het die name van die oorledenes ontvang en is besig om die familielede en naasbestaandes te kontak," het Nelson Kgwete, woordvoerder, gesê.

"Die slagoffers was vermoedelik 'n groep mans. Hulle was verbonde aan 'n privaat gekontrakteerde maatskappy."

Suid-Afrika se hoë kommissaris in Islamabad, Pakistan is Dinsdagoggend in kennis gestel dat agt Suid-Afrikaners in die aanval dood is.

Kgwete het die departement se medelye teenoor die vriende en familielede van die oorledenes uitgespreek en het gesê die departement sal ondersteuning aan die families bied.

– Volg Nuus24 op Twitter.

- SAPA