SA mans in ‘haglike toestande’ in Afgaanse tronk
2012-02-07 07:06
Pretoria – Die tandvleis van twee Suid-Afrikaners in ’n tronk in Afganistan is ontsteek weens wanvoeding, en selfs vir ’n tand-abses kry hulle miskien een parasetamol-pil vir die pyn.
Hulle kry daagliks droë brood vir ontbyt en aartappel en sous vir aandete – dit terwyl Afganistan een van die koudste winters in jare, met temperature van tot -23°C, beleef.
Só beskryf me. Hannelie Groenewald, wat saam met haar man opheffingswerk vir ’n Franse nieregeringsorganisasie in die Afgaanse gemeenskap doen, die mans se omstandighede nadat hulle die twee onlangs besoek het.
Phil Young van Kaapstad dien ses jaar tronkstraf uit omdat hy ’n Afgaanse veiligheidswag uit selfverdediging doodgeskiet het nadat dié op hom gevuur het. Hy moet nog sowat drie jaar uitdien.
Bevan Campbell van Randburg moet nog sowat ses jaar van sy tronkstraf uitdien. Hy is op Kaboel se lughawe met 5kg heroïen in sy bagasie betrap.
Die twee deel ’n sel in Kaboel se maksimumveiligheidstronk. Hulle word om veiligheidsredes in afsondering aangehou.
“Die tronk het twee maande gelede ’n nuwe bevelvoerder gekry. Sedertdien gaan dit baie slegter.
“Veral Bevan het baie gewig verloor sedert ons twee maande gelede by hulle was. Rys, die Afgaanse stapelvoedsel, is uit hul rantsoene gesny.
“Daar was ’n kiosk in die tronk waar hulle vroeër tamaties, uie, appels, en selfs suiker en snyboontjies kon koop.”
Nou is die kiosk nie meer beskikbaar nie, het sy gesê. Die tronkpersoneel skep vir hulle die beste kos in en die gevangenes kry die oorskiet.
Campbell het vier gebreekte tande. Weens ’n gebrek aan vitamiene, minerale en proteïene gaan hul gesondheid agteruit.
“Die Internasionale Rooi Kruis besoek hulle elke twee maande. Dié se verteenwoordigers sal dalk help om Bevan by ’n tandarts te kry.”
Nie een van die twee mans het regsverteenwoordiging nie. ’n Amerikaanse vroue-advokaat, wat hulle vroeër bygestaan het, kon weens die land se sjaria-wette niks uitrig nie en het die aftog geblaas, het Groenewald vertel.
Al waarop hulle nou hoop, is ’n presidensiële kwytskelding deur pres. Hamid Karzai, wat vroeër vir hulle afslag op hul tronkstraf gegee het. “Hulle doen Bybelstudie, lees boeke wat ons vir hulle neem, doen oefening die uur per dag wat hulle uit die sel gelaat word en skryf briewe.
“Die res van die tyd sit hulle maar en tob en wens die tyd om.”
’n Australiër is om onbekende redes ook in die tronk en heelparty Nigeriërs is in dieselfde blok, het Groenewald gesê.
Vroeër moes “ons elke keer om ’n besoekbrief aansoek doen, maar nou het ons ’n permanente brief, wat hopelik sal help”.
– Volg Nuus24 op Twitter
- Beeld