SA man kry 5 jaar tronkstraf in Afganistan
2010-02-03 07:20
Erika Gibson
Johannesburg - Vyf jaar in ’n Afgaanse tronk is net so goed soos die doodstraf.
So het die broer van Phil Young, ’n Suid-Afrikaner wat vandeesweek tot vyf jaar tronkstraf in Afganistan gevonnis is, gister gesê.
Volgens Pat Young is die ergste dat hy tot gister nog nie amptelike bevestiging kon kry wat presies die vonnis of uitspraak was nie.
“Ek kry teenstrydige boodskappe. Phil se werkgewer beweer hy is skuldig bevind en tronkstraf opgelê, terwyl ’n kontak van my in Kaboel beweer dit is nie waar nie.
“In hierdie stadium wag ek om ’n skriftelike kopie van die uitspraak te kry voordat ons kan besluit wat om verder te doen,” het Pat Young gesê.
Volgens hom het hy gistermiddag bevestiging van die departement van internasionale betrekkinge en samewerking gekry dat die vonnis wel gevel is.
Luidens dié bevestiging sal sy appèl binne 15 dae voor die Afgaanse appèlhof dien.
Sy broer, wat van Kaapstad kom en drie jong kinders het, is gearresteer nadat hy in September verlede jaar in Lasjkar Gah ’n ondergeskikte Afgaanse veiligheidswag uit noodweer geskiet het nadat dié glo eers op hom geskiet het.
“Die polisiebevelvoerder, wat ook die tolk in die hof was, het ook aan my gesê dit is nie waar dat Phil skuldig bevind is nie.
“Ons familie is tans verlam – ons weet nie hoe om te reageer nie, want ons kan nie kontak maak met enigiemand dáár nie.”
Die aanklaer in die saak het vroeër aangedui dat hy die doodstraf gaan vra.
Phil Young is saam met ’n Afgaanse kollega in hegtenis geneem ná die skietvoorval.
Hy is ’n veiligheidspesialis wat vir die Amerikaanse maatskappy Anham gewerk het as deel van die Amerikaanse regering se teennarkotika-inisiatief.
Luidens die klagstaat meen die staat dat Phil Young nie nodig gehad het om die ondergeskikte dood te skiet nie. Die Afgaan het glo net in die grond vasgeskiet voordat Phil Young hom twee keer in die bors geskiet het.
Die staat meen Phil Young se mate van noodweer was dus nie proporsioneel in ooreenstemming met die optrede van die wag nie.
Volgens Pat Young gaan hy geen steen onaangeraak laat as sy broer wel tronkstraf moet uitdien nie.
“Ek weet nie presies teenoor wie ’n mens kan kla nie. Phil se prokureur het onmiddellik appèl aangeteken teen die vonnis.
“As dít nie gaan werk nie, gaan ek met ’n reuse-petisieveldtog begin. Ek kan my broer nie aan die genade oorlaat nie.”
Phil Young sal die tweede Suid-Afrikaner wees om tronkstraf in Kaboel uit te dien.
Bevan Campbell van Randburg is in 2007 tot 16 jaar tronkstraf gevonnis nadat hy met 5 kg heroïen op die lughawe van Kaboel betrap is.
Campbell het aangevoer dat hy onder die indruk was dat die houers aanvullings bevat het om spiere te bou.
- Beeld