SA kry miljoene kondome van Brittanje
2010-03-10 06:55
Leopold Scholtz
Den Haag. – Die Britse regering gaan 42 miljoen kondome ter waarde van sowat R7,5 miljoen aan Suid-Afrika skenk, het die Britse minister van internasionale ontwikkeling, Gareth Thomas, gister aangekondig.
Hy het die aankondiging op ’n noodspitsberaad in Londen oor MIV-voorkoming en –behandeling gedoen.
Dit is ’n uitvloeisel van ’n versoek wat pres. Jacob Zuma op sy pas afgelope staatsbesoek aan Brittanje gerig het.
Die verwagting is dat ’n halfmiljoen toeriste Suid-Afrika tydens die Wêreldbeker-sokkertoernooi sal besoek en dat baie van hulle die dienste van plaaslike prostitute sal wil hê.
Die verwagting is dat Suid-Afrika ’n toevloei van sowat 40 000 prostitute uit naburige lande en Oos-Europa sal ondervind. Luidens ’n berig in The Guardiankan dit ’n “MIV-tydbom” skep.
Die koerant se korrespondent in Johannesburg berig dat Suid-Afrikaanse mans sowat 450 miljoen kondome per jaar gebruik.
- Die Burger