SA gaan help in Haïti
2010-01-15 09:35
Erika Gibson
Pretoria – Die Suid-Afrikaanse regering en noodlenigingswerkers het Donderdag saam met die res van die wêreld hul harte vir die aardbewinggeteisterde inwoners van Haïti oopgemaak.
Twee soek- en reddingspanne van onderskeidelik Rescue South Africa en Gift of the Givers sou Donderdagaand na Haïti vertrek.
Volgens dr. Imtiaz Sooliman van Gift of the Givers sal ’n tweede span binne die volgende twee dae volg. Ahmed Bam is die leier van die span rampreaksie- en reddingspesialiste en paramedici. Dié span neem R2,5 miljoen se reddingstoerusting saam.
Die regering se hulp aan die land word in drie fases aangepak met die soek- en reddingspanne wat deur Suid-Afrika se nasionale rampbestuursentrum gekoördineer word.
Volgens Saul Molobi, woordvoerder van die departement van internasionale betrekkinge en samewerking, sal ’n groep Suid-Afrikaanse patoloë vroeg volgende week volg wanneer die meeste van die slagoffers reeds uitgegrawe is.
“Hulle sal dan help met die identifisering van die mense. Die derde fase behels die humanitêre of heropboufase waar groeperings soos Gift of the Givers met noodvoorraad en mediese hulp sal help.”
Volgens Molobi het die regering R1 miljoen beskikbaar gestel om die onderskeie groepe in die noodlenigingspoging by te staan.
Die Franse regering het ingestem om die noodwerkers kwyt te skeld van enige visumvereistes om te verseker dat hulle vinniger in die rampgebied kan kom.
Volgens Colin Deiner van Rescue South Africa is sý span saamgestel uit nooddiens- en rampwerkers wat heeltyds in diens van die Gautengse regering is. Vier snuffelhonde van die polisie sal help soek na oorlewendes. Volgens Deiner sal hulle onder die bevel en beheer van die Verenigde Nasies se rampsentrum in Port-au-Prince werk. Dié besluit watter noodwerkers van watter lande na gelang van hul kwalifikasies in toegewysde gebiede werk om te verseker die mense word reg ingespan.
“Ons is selfonderhoudend en neem toerusting saam soos lugkussings om betonblokke te lig en kameras met mikrofone om in puin te laat sak.”
Enige Suid-Afrikaners wat ’n bydrae tot die noodlenigingspoging wil lewer, kan mnr. George Killian, hoof van die rampbestuursentrum, by 012-334-0667 bel.
- Volksblad