Russe vlug uit Siriese bloedbad
2013-01-22 12:48
Beiroet – Tot 150 Russe maak gereed om in die volgende twee dae uit die geweldgeteisterde Sirië te vlug, het ‘n diplomaat Dinsdag aan AFP gesê.
Hulle sal op twee vliegtuie wat van Moskou na Beiroet gestuur is, vlieg.
Die diplomaat hou vol dat dit nie die begin is van ‘n veldtog om Russiese burgers uit Sirië te ontruim nie.
“Daar is duisende Russiese burgers in Sirië. Die kwessie is dat die Russiese lugredery nie meer na Damaskus vlieg nie, so ons help so 100, maksimum 150 mense om Sirië via Beiroet te verlaat,” het die diplomaat op voorwaarde van anonimiteit gesê.
“Ons is eenvoudig besig om mense te help wat die Russiese konsulaat in Damaskus om hulp genader het.”
Hoewel die Russiese konsulaat in Damaskus nie gesluit is nie, is die pad wat die internasionale lughawe met die hoofstad verbind in onlangse weke bykans onbegaanbaar weens geweld.
Die diplomaat het vroeëre berigte dat Moskou sy burgers uit Sirië ontruim, as onwaar afgemaak.
“Hierdie is nie ‘n ontruiming nie. Daar is absoluut geen druk op Russe in Sirië om die land te verlaat nie, want daar is baie gebiede in Damaskus wat geheel en al veilig en vry is van geweld of enige gevegte,” het die diplomaat gesê.
– Volg Nuus24 op Twitter
- Sapa - AFP
