Rooikruis kan nie byhou in Sirië

2012-11-08 15:50

Aleppo – Die Rooikruis het gesê hy kan nie byhou met die verslegtende situasie in Sirië nie.

“Die humanitêre situasie raak net erger,” het Peter Maurer, president van die internasionale komitee van die Rooikruis (ICRC), gesê.

Maurer het bygevoeg dat die konflik elke dag meer slagoffers eis, wat dit baie moeilik maak om slagoffers te bereik, het BBC News berig.

Hy het gesê hy is nie in dié stadium seker hoeveel mense nie die hulp ontvang wat hulle benodig nie.

Die Rooikruis kan ook nie in sekere dele van die land werk nie, omdat dit te gevaarlik is.

‘n Siriese mediese groep het Woensdag beweer dat 95% van buitelandse mediese voorraad direk aan regeringsmagte verskaf word. Die Rooikruis het egter gesê dié bewering is ongegrond.

Intussen het Siriese opposisiegroepe in Katar vergader om ‘n oplossing vir die voortslepende konflik in die land te probeer vind.

– Volg Nuus24 op Twitter