Romney kap terug oor gay huwelike

2012-05-12 18:13

Lynchburg, Virginia – Die Amerikaanse Republikeinse presidentskandidaat Mitt Romney het Saterdag sy teenkanting teen gay huwelike herbevestig in 'n toespraak by die land se grootste Christelike universiteit.

Drie dae ná pres. Barack Obama bekendgemaak het dat hy gay en lesbiese huwelike steun, het Romney gesê die "belangrikheid van die familie" is die hoeksteen van die beginsels waarop die Amerikaanse kultuur gebou is.

"Al is hierdie beginsels so belangrik, kan hulle wel die onderwerp van demokratiese debatte word," het Romney aan studente by Liberty Universiteit gesê.

"So is dit vandag ook met die voortdurende instelling van die huwelik. Die huwelik is 'n verhouding tussen een man en een vrou," het hy gesê.

Hy is luid deur die gehoor toegejuig.

Romney het al voorheen gesê dat hy teen gay huwelike is, maar meen ook paartjies van dieselfde geslag moet sekere regte hê, soos die reg om kinders aan te neem.

– Volg Nuus24 op Twitter.

- Sapa - AFP