Rits aanvalle eis nóg lewens in Irak
2011-12-03 23:05
Bagdad – Aanvalle in Irak het Saterdag die lewens van vyf mense geëis, insluitend dié van 'n brigadier-generaal in die weermag.
Drie ander mense is ook gewond, het veiligheidsbeamptes gesê.
Gewapende aanvallers het brig.genl. Fadhel al-Azul en sy vrou in die Urr-buurt in die noorde van Bagdad afgemaai, het 'n amptenaar van die departement van binnelandse sake gesê.
In 'n ander voorval het 'n bom 'n drankwinkel naby Camp Rashid in sentraal-Bagdad in puin gelê, en drie mense gewond, het die amptenaar gesê.
Twee mense is ook dood toe gewapende mans 'n huis in die suidelike deel van die noordelike stad Mosul aangeval het, het 'n luitenant in die Mosul-polisie gesê.
Gewapende aanvallers het ook iemand in die gebied naby Mosul doodgeskiet, het die luitenant gesê.
– Volg Nuus24 op Twitter.
- SAPA