Reuse-aardbewing tref Indonesiese kus
2012-01-11 08:01
Djakarta – Angsbevange mense in Indonesië het oornag die strate ingevaar nadat ’n aardbewing van 7,3-sterkte die weskus van Noord-Soematra geruk het.
Die aardbewing het om 02:37 sowat 420 km suidwes van Banda Aceh op ’n diepte van 29 km plaasgevind.
Die Indonesiese meteorologie- en geofisika-agentskap en die Stille Oseaan-tsoenami-waarskuwingsentrum het albei ’n tsoenami-waarskuwing uitgereik.
“Die aardbewing was in die see en ’n tsoenami-waarskuwing is uitgereik, maar daar is tot dusver geen berigte van ongevalle of skade nie,” het die tegniese hoof van die agentskap gesê.
Die tsoenami-waarskuwingsentrum het gesê daar is nie ’n moontlikheid van ’n wydverspreide tsoenami nie, maar het bygevoeg: “Daar is ’n baie klein moontlikheid dat ’n plaaslike tsoenami kusgebiede kan raak wat minder as 100km van die episentrum van ’n aardbewing geleë is.”
Die tsoenami-waarskuwing is later teruggetrek.
In Banda Aceh het die aarde vir sowat 30 sekondes geskud en groot getalle angsbevange inwoners het uit hul huise en ander geboue gehardloop en die strate ingevaar op soek na veiligheid.
Die meeste van hulle het kort daarna weer na geboue teruggekeer.
Ooggetuies het gesê geen groot skade is in die provinsiale hoofstad aangemeld nie.
In Desember 2004 het ’n reuse-aardbewing van 9,1- sterkte langs die kus van die Aceh-provinsie tot ’n tsoenami in die Stille Oseaan gelei.
Altesaam 220 000 mense is destyds in verskeie lande in die Stille Oseaan dood, waarvan driekwart in Indonesië was.
– Volg Nuus24 op Twitter
- Sapa - AP