Regse politikus vrygespreek van haatspraak
2011-06-24 08:13
Den Haag - Een van die mees bisarre regsake in Nederland se geskiedenis het Donderdag tot ’n einde gekom toe die Amsterdamse regbank die omstrede ekstreemregse politikus Geert Wilders onskuldig aan haatspraak teen Moslems bevind het.
Wilders se onmiddellike reaksie was dat die uitspraak ’n oorwinning vir die vryheid van spraak is.
Wilders is oorspronklik deur ’n groep Islamitiese Nederlanders van haatspraak aangekla weens sy gereelde opruiende uitlatings teen die aanwesigheid van Moslems in die land.
Die openbare vervolger het egter geen regsgronde gesien om hom aan te kla nie, waarna die groep hom na die Amsterdamse hooggeregshof gewend het – en dié het toe besluit dat Wilders wél aangekla mag word.
In die hofsaak wat hierop gevolg het, het die aanklaer vryspraak gevra, moontlik die eerste keer in die geskiedenis dat so iets gebeur het. Maar Wilders se advokaat het toe gevra dat die drie regters hulle aan die saak onttrek omdat hulle blyke van bevooroordeeldheid sou gegee het.
In ’n spesiale verhoor deur ánder regters het die advokaat sy sin gekry, en die hele saak moes dus weer van voor af begin.
Weer het die aanklaer, uiteraard gesteun deur Wilders se advokaat, vryspraak gevra. Dít is Donderdagoggend toegestaan.
In hul uitspraak het die regters Wilders wel betig dat sy uitsprake “op die grens van die toelaatbare” is. Sy toesprake is gereeld “grof en beledigend”, en ook “kwetsend en skokkend”.
Maar volgens die regters was sy taalgebruik nie “bedreigend” nie, en daarmee het hy nie die grens oorskry nie.
Die groep wat oorspronklik die saak teen Wilders gebring het, het te kenne gegee dat hy hom nou tot die Menseregtekomitee van die Verenigde Nasies gaan wend.
In ’n verklaring het die groep gesê die uitspraak gee Wilders toestemming om te doen wat hy sê, naamlik ’n verbod “om Moslems verder in Nederland toe te laat, die Koran te lees of nog moskees in Nederland te bou”.
Parlementslede van alle partye was tevrede. Die openbare debat hoort in die politieke arena tuis, nie in die regsaal nie, was die algemene strekking van die reaksies.
Volg Nuus24 op Twitter.
- Die Burger