Reën belemmer Moembaai-ondersoek
2011-07-15 14:50
Moembaai – Indiese ondersoekbeamptes is vasbeslote om ‘n deurbraak te maak rakende die bomaanvalle wat die week in Moembaai, Indië, uitgevoer is.
Die polisie is egter nog op soek na leidrade en verdagtes terwyl die moesonreën op die stad toesak.
Sewentien mense is dood en talle ander is beseer toe bomontploffings drie besige dele van Moembaai Woensdagaand geruk het.
Daar heers tans vrese dat die stortreën in Moembaai die ondersoek na die terreuraanvalle kan belemmer en noodsaaklike forensiese leidrade kan wegspoel.
Ondersoekbeamptes het beeldmateriaal begin versamel wat sekuriteitskameras by die drie plekke wat aangeval is, vasgevang het. Hulle sal die beeldmateriaal gebruik om vas te stel wat presies gebeur het.
Forensiese bestudering van die puin het reeds aangedui dat die bomme, wat in die besige strate weggesteek is, die bestanddeel ammoniumnitraat bevat het. Dié bestanddeel word dikwels gebruik om ploftoestelle te maak.
Rakesh Maria, hoof van die Maharashtra-staat se eenheid wat terrorisme beveg, het Donderdagaand erken dat die seisoenale reën die wetenskaplikes verhinder om hul werk te doen.
Volg Nuus24 op Twitter.
- AFP