Rebellie teen Cameron verwag oor EU-magte
2011-10-21 07:07
Den Haag – ’n Rebellie dreig teen David Cameron, Britse premier, in die koukus van sy eie Konserwatiewe Party. Wanneer die laerhuis Maandag die Europese Unie (EU) en die finansiële hulp aan Griekeland debatteer, gaan tientalle Tory-LP’s, soos dit nou lyk, teen hul eie leier stem.
Die opstand word gelei deur Graham Brady, wat Donderdag ’n skoot oor Cameron se boeg in ’n artikel in die Daily Telegraph geskiet het. Hy gaan Maandag vir ’n mosie stem dat die Britte in ’n referendum kans gegee word om hulle oor Brittanje se lidmaatskap van die EU uit te spreek.
Hy het gesê die beginsel van ’n referendum is reeds sedert 1975 aanvaar, maar sedertdien is ’n horde magte van Westminster aan Brussel oorgedra, sonder dat die Britte se mening getoets is.
Sy kollega, David Nutall, wat ingewillig het om die mosie in te dien, het aan die koerant gesê as ’n referendum in die vooruitsig gestel word, kan dit Cameron se hand sterk wanneer hy in Brussel onderhandel.
Cameron het Woensdag gesê hy is teen ’n referendum gekant. So iets kan gehou word indien Westminster sy mag aan Brussel moet afstaan – en bowendien wil die regering die magte terugkry wat reeds oorgedra is.
Volgens verskeie Britse koerante sal ’n Tory-LP ’n amendement indien wat die regering versoek om die kwessie van Brussel se magte in ’n witskrif te ondersoek. Cameron oorweeg dit om partydissipline toe te pas om die rebelle in die bek te ruk, maar sowel Grady as Nuttall het te kenne gegee hulle gaan hulle nie daaraan steur nie.
Alle oë sal daarom Maandag op die Laerhuis gerig wees om te sien hoeveel Tories hul leier se gesag gaan uitdaag.
Die debat verkry ekstra dringendheid in die lig van die geluide wat algemeen op die Europese vasteland opklink dat die finansiële krisis slegs doeltreffend beveg kan word as die EU meer mag kry.
– Volg Nuus24 op Twitter
- Die Burger