Radiostasie skenk geld ná selfmoord

2012-12-12 09:00

Sydney – Die Australiese radiostasie wat 'n fopoproep na 'n Londense hospitaal gemaak het wat oënskynlik gelei het tot die selfmoord van 'n verpleegster, het Dinsdag gesê minstens 500 000 Australiese dollar (sowat R4,5 miljoen) sal aan 'n fonds ten bate van haar familie geskenk word, het CNN berig.

Jacintha Saldanha het selfmoord gepleeg ná sy 'n fopoproep deur twee Australiese platejoggies na 'n kollega deurgeplaas het wat inligting oor Prins William se vrou, Catherine, verstrek het.

Die 2DayFM-radiostasie is skerp gekritiseer vir die oproep.

Die mediagroep wat die stasie besit het gesê advertensies sal weer op die program aanvaar word, ná alle advertering geskrap is in die nadraai van die oproep.

Al die stasie se wins tot die einde van die jaar sal egter aan "'n gepaste fonds" geskenk word ten bate van Saldanha se gesin. Die maatskappy het hom verbind tot 'n minimum bedrag van 500 000 Australiese dollar.

– Lees hier meer.

– Volg Nuus24 op Twitter.