Duitse tiener en pa bly 5 jaar in woude
2011-09-20 07:40
Den Haag – Die Duitse polisie krap kop nadat ’n verwaarloosde seun van sowat 17 jaar in Berlyn opgedaag en vertel het hy en sy pa het die afgelope vyf jaar in die woude suid van die stad gewoon.
Die seun, wat homself Ray noem, het op 5 September by die stadshuis opgedaag. Hy is Engels goed magtig, maar ken net ’n bietjie Duits.
Ray weet nie wat sy van is of waarvandaan hy oorspronklik kom nie.
Hy het aan die polisie vertel sy ma het vyf jaar gelede in ’n motorongeluk gesterf, maar hy weet nie waar nie. Sedertdien het hy en sy pa in die woude oorleef deur te jag en selfs hul eie groente te kweek.
Sy pa het onlangs van ’n krans afgeval en is dood. Ray het sy lyk onder ’n hoop klippe toegepak en toe die pad na Berlyn gevat.
Die polisie het gesê geen rede bestaan om die seun nié te glo nie. Taalkenners ondersoek nou sy Engelse aksent om vas te stel waar in Brittanje hy moontlik vandaan kan kom. Interpol se hulp is ook ingeroep.
Foto’s van Ray is in Britse koerante gepubliseer, maar teen Maandag was daar nog geen duidelikheid oor sy identiteit nie. Hy is blykbaar in goeie gesondheid, maar die Duitse polisie meen hy is getraumatiseer. Hy ontvang dus behandeling van kindersielkundiges.
Van sy karige beskrywing word afgelei dat hy en sy pa in ’n woud op die grens van Beiere en Tsjeggië geleef het.
Volg Nuus24 op Twitter.
- Volksblad