Raaisel oor lyk op dwelm-seiljag opgelos

2012-11-27 08:06

Nuku'alofa – 'n Lyk wat aan boord 'n seiljag gevind is wat langs 'n verlate eiland in die Stille Oseaan gestrand het, is geïdentifiseer as dié van 'n man van Slowakye.

Die seiljag het meer as 200 kg kokaïen aan boord gehad toe dit gevind is.

Die polisie in Tonga sê die lyk van die man wat vroeër dié maand op die 13 m lange seiljag JeReVe gevind is, is dié van ene Milan Rindzak, 35.

'n Internasionale polisietaakmag het die vaartuig gemonitor toe dit Suid-Amerika verlaat het. Owerhede het egter kontak met die seiljag verloor, en twee duikers het dit later langs 'n onbewoonde eiland in Tonga se Vava'u-eilandgroep gevind.

Ondersoekbeamptes het Rindzak se lyk en 204 sakkies kokaïen van een kilogram elk op die seiljag gevind.

Grant O'Fee, polisiekommissaris van Tonga, sê 'n nadoodse ondersoek en Rindzak se paspoort het die polisie gehelp om die man se identiteit vas te stel.

Ander paspoorte is ook op die vaartuig gevind, en die ondersoek duur voort. Die oorsaak van Rindzak se dood is ook nog nie bekend nie.

– Volg Nuus24 op Twitter.

- AFP