Raaisel ná slagting in afgeleë gemeenskap

2012-08-30 14:20

Caracas – ‘n Groep Yanomami-Indiane sê lede van ‘n afgeleë gemeenskap in Venezuela is onlangs in ‘n wrede slagting vermoor.

Hulle het beamptes gevra om na die dorp te reis om ondersoek in te stel en sê inwoners beweer tientalle mense is vermoor.

Die Horonami Yanomami-organisasie het in ‘n verklaring gesê die gemeenskap van Irotatheri in die suide van Venezuela, naby die grens met Brasilië, is verlede maand aangeval.

Brasiliaanse mynwerkers word glo van die moorde verdink.

Luis Shatiwe Ahiwei, ‘n leier van die groep, sê besoekers van ‘n nabygeleë dorp het op die mense se verkoolde lyke afgekom. Die hut waarin hulle gewoon het is ook afgebrand.

Hy sê dit is onduidelik hoeveel mense dood is.

Volgens getuies het sowat 80 mense in Irotatheri gewoon, maar slegs drie oorlewendes, wat na die woude gevlug het, is gevind.

Die motief vir die moorde is nie bekend nie.

– Volg Nuus24 op Twitter

 

- Sapa - AP