R4 miljard se diamante by lughawe gesteel
2013-02-19 11:56
Brussel – Gewapende mans het ‘n groot hoeveelheid diamante gesteel terwyl dit op ‘n vliegtuig by die Brussel-lughawe gelaai is, het die Belgiese media Dinsdag berig.
Altesaam 10 kg diamante met ‘n waarde van €350 miljoen (sowat R4 miljard) is laat Maandag gesteel, het die uitsaaier VRT berig.
Die diewe het glo omstreeks 19:47 (18:47 GMT) met twee voertuie deur ‘n heining by Brussel se hooflughawe gebreek, het die lughawe in ‘n verklaring gesê.
“Die mans in die motor het na ‘n Switserse vliegtuig gery, waar hulle waardevolle items gesteel het,” het die verklaring gelui.
“Daar was nie ‘n skietery nie en niemand is beseer nie. Dit het slegs ‘n paar minute geduur en ná dit het hulle die lughawe deur die beskadigde heining verlaat.”
Die diewe het ‘n voertuig van 'n sekuriteitsmaatskappy geteiken wat besig was om die diamante op die vliegtuig te laai. Die vliegtuig was op pad na Zürich, het mediaberigte gelui.
‘n Voertuig wat uitgebrand het, is later in die buitewyke van Brussel gevind. Die polisie stel ondersoek in om vas te stel of dit een van die wegkommotors was, het VRT berig.
– Volg Nuus24 op Twitter
- Sapa-DPA
