R39 miljard te wen in lotery
2011-12-22 08:01
Miljoene geldhonger Spanjaarde raap kaartjies op vir die wêreld se grootste loterytrekking wat Donderdag pryse ter waarde van altesaam €3,6 miljard (R38,8miljard) bied.
Na verwagting sal vier uit elke vyf Spanjaarde te midde van ’n werkloosheidsyfer van 21,5% en ’n dreigende resessie gemiddeld €60 se kaartjies vir die nasionale lotery, bekend as El Gordo (“Die Grote”) koop.
El Gordo is al amper twee eeue lank ’n Kersfeestradisie en elke jaar word ’n fortuin gemaak, waarvan 70% as prysgeld aangebied word.
Die boerpot is vanjaar €300 000 (R3 240 556).
Bygelowige deelnemers staan ure lank tou by die Dona Manolita-kaartjiewinkel waar verskeie wenkaartjies voorheen verkoop is.
Die gelukkige nommers sal op vanaand deur weeskinders op nasionale TV uitgesing word.
Spanjaarde besnoei vanjaar Kersuitgawes in die vooruitsig van ’n troostelose ekonomie wat vir 2012 voorspel word.
Die nuwe Konserwatiewe premier, mnr, Mariano Rajoy, het belastingbesnoeiings van €16,5 miljard (R81miljard) belowe.
Die uitgaande Sosialistiese regering was van plan om ’n 30%-aandeel in die winsgewende lotery te verkoop.
Dit sou soveel as €7,5 miljard vir die gestroopte staatskoffers inbring.
Hulle het die verkoping egter in September afgestel – volgens hulle omdat tuimelende markte die verkoopsprys sou afbring.
Volg Nuus24 op Twitter.
- Die Burger