R2,1 miljard se dwelms in stoomroller gevind

2012-11-21 09:17

Sydney – Die polisie in Australië het beslag gelê op kokaïen en metamfetamien met 'n geraamde waarde van A$237 miljoen (sowat R2,1 miljard).

Die dwelms was versteek in 'n stoomroller wat vanaf China verskeep is.

Die polisie in Australië het Woensdag gesê 'n Kanadese en 'n Amerikaanse man is in Sydney in hegtenis geneem nadat die 350 kg kokaïen en metamfetamien gevind is. Die mans word daarvan aangekla dat hulle dwelms ingevoer het en kan tot lewenslange tronkstraf gevonnis word indien hulle skuldig bevind word.

Dit is die tweede groot dwelmvonds in minder as 'n week.

Die polisie het Vrydag gesê beamptes het beslag gelê op 'n boot wat 200 kg dwelms na Australië vervoer het. 'n Lyk is aan boord van die boot gevind en beamptes probeer die oorsaak van die persoon se dood vasstel.

– Volg Nuus24 op Twitter

- SAPA