R2 milj. kontant onder huis se vloer in Japan gevind

2012-10-17 12:03

Tokio – Konstruksiewerkers in Japan wat besig was om 'n huis af te breek, het $330 000 (sowat R2 miljoen) kontant in 'n metaalhouer onder die huis se sitkamervloer ontdek.

Die huis, wat in 'n boerderygemeenskap op die noordelike eiland van Hokkaido geleë is, het sedert die bejaarde eienaar twee jaar gelede gesterf het, leeg gestaan.

Die kontant (sowat 2 600 note wat elk 10 000 yen werd is) saamgebondel of in koeverte – sal aan die oorlede man se naasbestaandes oorhandig word.

"Omdat die geld in 'n huis gevind is, is dit duidelik aan wie dit behoort," het 'n woordvoerder vir die plaaslike polisie gesê.

"Dis dus nie 'n geval van verlore goedere waarvoor ons 'n eienaar moet vind nie."

Volg Nuus24 op Twitter.

- Sapa - AFP