Pussy Riot-lid in hospitaal

2013-02-01 12:13

Moskou – Een van die lede van die Pussy Riot-rockgroep, wat tans twee jaar se tronkstraf uitdien weens 'n protesoptrede verlede jaar, is gehospitaliseer.

Kristina Belousova, ‘n polisiewoordvoerder, het Vrydag gesê Nadezhda Tolokonnikova is in ‘n gevangenishospitaal in die weste van Rusland opgeneem.

Belousova wou egter nie sê hoekom Tolokonnikova in die hospitaal opgeneem is nie en het net gesê dat dit nie iets ernstigs is nie.

Yekaterina Samutsevich, ‘n lid van die groep wat ook twee jaar tronkstraf gekry het, maar later op appèl vrygelaat is, sê Tolokonnikova ly aan erge hoofpyne.

Samutsevich het op Rain TV gesê Tolokonnikova kry nie genoeg rus in die tronk nie.

Die twee groeplede is in Augustus tot twee jaar tronkstraf gevonnis vir 'n protesoptrede in Moskou se hoofkatedraal, waartydens hulle teen pres. Vladimi Putin uitgevaar het.

– Volg Nuus24 op Twitter
 

- Sapa - AP