Prins Harry veg dalk weer in Afganistan
2011-06-17 07:51
Den Haag – Die moontlikheid is goed dat prins Harry van Brittanje (26) aanstaande jaar weer in Afganistan teen die Taliban gaan veg.
Verskeie Britse koerante het Donderdagoggend berig dat die kursus wat Harry nou volg om as vlieënier te veg met die Apache-aanvalshelikopter, wat die Britse ekwivalent van die Suid-Afrikaanse Rooivalk is, oor sewe maande voltooi sal wees.
Dit beteken dat hy in aanmerking sal kom om, wanneer sy eskader aanstaande jaar in Afganistan ontplooi word, saam te gaan.
Hy het vroeër vanjaar sy vlerkies gekry en is nou ’n helikoptervlieënier. Die kursus wat hy doen, is ’n gevorderde gevegskursus.
Dit sal die tweede keer wees dat die jong prins in dié land veg. In 2008 was hy ook daar as voorwaartse lugbeheerder in die regiment Household Cavalry – wat bomwerpers van die grond af beheer – maar toe die nuus van sy aanwesigheid daar uitlek, is hy haastig teruggeroep.
Blykbaar is sy ouma, koningin Elizabeth, en sy pa, prins Charles, nie baie geesdriftig oor die idee dat hy teruggaan nie. Maar Harry het destyds in verskeie onderhoude laat blyk dat hy graag weer in Afganistan wil dien, en sy ouma en pa het te kenne gegee dat hulle nie in sy pad sal staan nie.
’n Woordvoerder van die departement van verdediging het gesê hy kan nie kommentaar lewer op die ontplooiing van individuele soldate nie.
Volg Nuus24 op Twitter.
- Volksblad