Harry tydens aanval na veiligheid geneem

2012-09-18 08:30

Londen – Prins Harry is na 'n plek van veiligheid geneem tydens 'n Taliban-aanval op Kamp Bastion, die basis waar hy in Afganistan ontplooi is, het Brittanje se ministerie van verdediging gesê.

Twee Amerikaanse soldate is dood toe aanvallers verlede Vrydag die Navo-basis in die Helmand-provinsie bestorm het.

"Addisionele sekuriteitsmaatreëls is in plek" om Harry te beskerm, het Philip Hammond aan die BBC se Newsnight on Monday gesê.

Die prins was ongeveer twee kilometer weg saam met ander Apache-bemanningslede toe die Navo-basis aangeval word, maar was nie in gevaar nie, het Hammond gesê.

Hy het gesê hoewel die 28-jarige koninklike "nie meer of minder blootgestel is as enige ander Apache-vlieënier nie," word hy steeds beskerm.

"Hy doen diens as 'n gewone beampte, maar daar is addisionele sekuriteitmaatreëls in plek omdat hy self 'n teiken kan wees," het Hammond bygevoeg.

Hoewel die Taliban gedreig het om prins Harry te teiken, het een van sy woordvoerders aan AFP gesê Vrydag se aanval was nie op die prins gemik nie.

– Volg Nuus24 op Twitter.

- Sapa - AFP