Premier se seun is NS se beste 'planker'
2011-05-31 11:11
Wellington – John Key, premier van Nieu-Seeland, se seun is Dinsdag as die land se beste “planker” vereer nadat ‘n foto van hom op die internet verskyn het.
Die foto waarin Max Key die nuwe internet-gier uitvoer wys hoe sy pa na sy toertjie kyk.
New Zealand Herald berig dat sy foto, wat op die Facebook-blad Planking New Zealand verskyn het, talle internet-gebruikers op hol gehad het.
Die foto wys hoe Max op die agterkant van ‘n bank in die premierswoning “plank”.
Volgens die koerant is die 16-jarige seun “Nieu-Seeland se top-planker”. Die berig dui aan dat die premier nie persoonlik in die toertjie deelgeneem het nie.
“Planking” behels persone wat plat op hul mae lê en hul hande teen hul lywe hou in ongewone en soms gevaarlike situasies. Die foto’s van die toertjie word daarna op sosiale netwerke geplaas.
Die gier word aan minstens een sterfte gekoppel. ‘n Man het vroeër vandeesmaand in Brisbane, Australië, na sy dood geval terwyl hy “planking” op 'n sewe-verdieping-hoë balkon uitgevoer het.
‘n Ander Australiër is in ‘n koma nadat hy die gier op die dak van ‘n bewegende voertuig uitgevoer het.
Volg Nuus24 op Twitter.
- Sapa - AFP