Pous verskyn ná skok-aankondiging

2013-02-13 10:52

Vatikaanstad – Duisende gelowiges sal Woensdag by die St Petrus-plein saamtrek om pous Benedictus XVI te groet wanneer hy vir die eerste keer sedert die onverwagte aankondiging oor sy uittrede 'n openbare verskyning maak.

Die 85-jarige, wat Maandag bekendgemaak het dat hy weens sy ouderdom op 28 Februarie sal uittree, sal om 09:30 GMT op sy balkon, wat oor die plein uitkyk, verskyn.

Hy sal om 14:00 GMT Aswoensdag by die St. Petrus-basilika vier. Dit sal sy laaste openbare kerkdiens en een van sy laaste verskynings as pous wees.

Die diens word tradisioneel by die Santa Sabina-kerk op Rome se Aventine-heuwel gehou.

Dit is egter geskuif uit respek vir die pous en sy aanhangers wat die einde van sy agt jaar as kerkleier – een van die kortstes in die kerk se geskiedenis – sal vier.

“Dit gaan ‘n belangrike viering wees en die laaste wat deur die Heilige Vader in San Pietro gehou word,” het Federico Lombardi, woordvoerder van die Vatikaan, gesê.

– Volg Nuus24 op Twitter
 

- AFP