Pous se huiskneg kry 18 maande tronkstraf

2012-10-06 12:57

(AP)

Vatikaanstad –  Pous Benedictus XVI se voormalige huiskneg, Paolo Gabriele, is Saterdag tot 18 maande tronkstraf gevonnis omdat hy geheime dokumente van die Vatikaan gesteel het wat bedrog en intrige in dié piepklein staat blootlê.

Regter Giuseppe Dalla Torre het die voormalige huiskneg drie jaar tronkstraf opgelê, maar hy het die vonnis dadelik tot 18 maande verkort op grond van die diens wat Gabriele vir die Katolieke Kerk verrig het, en weens die feit dat hy om verskoning gevra het.

Die Pous het onlangs vir die eerste keer sy stilte oor die uitgelekte dokumente verbreek, en gesê hy is bedroef deur die verraad.

Hy het egter gesê hy is dankbaar vir diegene wat hom getrou en in stilte help om sy werk te doen.

Die Pous het ook sy ongelukkigheid oor sommige mediaberigte oor die skandaal uitgespreek en gesê "oordrewe" en "ongegronde" gerugte het 'n valse beeld van die Katolieke Kerk geskep.

– Volg Nuus24 op Twitter.

- AFP