Pous oorweeg uittrede glo al maande
2013-02-11 14:39
Vatikaanstad – Die Vatikaan het gesê dat pous Benedictus XVI se uittrede 'n verrassing was, terwyl sy broer gesê het dat hy die besluit al maande lank oorweeg.
Dit kom ná die 85-jarige leier van die Rooms-Katolieke Kerk Maandagoggend tydens 'n byeenkoms van kardinale aangekondig het dat hy sy amp neerlê.
“Die pous het aangekondig dat hy sy posisie teen 19:00 op 28 Februarie sal verlaat,” het Federico Lombardi, woordvoerder vir die Vatikaan, gesê.
Lombardi het gesê die pous se besluit het die Vatikaan verras, en het bygevoeg dat sy ywer “ongelukkig die afgelope tyd afgeneem het.”
Die pous het tydens die byeenkoms van kardinale gesê dat hy die besluit geneem het ná 'n lang periode van selfondersoek.
“Ek het tot die gevolgtrekking gekom dat my krag, as gevolg van my gevorderde ouderdom, my nie toelaat om... my bediening voldoende uit te voer nie,” het die pous gesê.
Hy het die verklaring in die Vatikaan se amptelike taal, Latyns, voorgelees.
“Ek is deeglik bewus daarvan dat hierdie bediening, as gevolg van die noodsaaklike en geestelike aard daarvan, nie net met woorde en dade uitgevoer moet word nie, maar ook met gebed en lyding.”
Georg Ratzinger, die pous se broer, het aan Sky News gesê dat sy broer se dokter aanbeveel het dat hy nie meer oorseese reise aanpak nie. Hy het gesê sy broer het sy uittrede maande lank oorweeg.
Hy het bygevoeg dat sy broer sukkel om te loop en dat sy besluit deel van ‘n “natuurlike proses” is.
“Sy ouderdom haal hom in,” het die 89-jarige oor Benedictus XVI gesê.
“Op hierdie ouderdom soek my broer meer rus.”
Lombardi het intussen bevestig dat die volgende pous voor Paasfees gekies behoort te word.
– Volg Nuus24 op Twitter
- Reuters
