Pous feitlik blind in een oog

2013-02-20 18:05

Vatikaanstad – Pous Benedictus  XVI is feitlik blind in sy een oog en is deur sy dokter aangeraai om eerder nie te vlieg nie weens sy hoë bloeddruk, het die Vatican Insider-webwerf Woensdag berig.

Die berig het verder ook gesê die 85-jarige het gereeld slaapprobleme en hy het al in onlangse jare verskeie kere uit die bed geval terwyl hy op buitelandse besoeke was, wat hom gevolglik moeg gelaat het tydens openbare verskynings.

Die dokter se aanbevelings skets 'n prentjie van progressiewe agteruitgang van sy gesondheid en sy energie – ‘n konteks wat die moeilike besluit wat die pous geneem het ten volle regverdig,” het Marco Tosatti, ‘n spesialis in handelinge van die Vatikaan, geskryf nadat die pous bekendgemaak het dat hy weens ouderdom gaan uittree.

Die berig het die pous se dokter, Patrizio Polisca, aangehaal nadat hy twee jaar gelede gesê het Benedictus se bloeddruk raak aansienlik hoog en hy het aangedring dat hy “so min moontlik tyd op vliegtuie deurbring as gevolg van die gevare”.

Tosatti het verder gesê die pous “kan amper glad nie meer sien” uit sy linkeroog nie en gevolglik moet hy by trappe op en af gehelp word.

Volgens die berig het Benedictus selfs verlede jaar begin om met ‘n kierie te loop om by sy eie huis rond te beweeg omdat sy linkerheup en knie seer was.

– Volg Nuus24 op Twitter
 

- Sapa - AFP